Buka Palang Pintu Dalam Tradisi Betawi

kebudayaan betawi – Buka Palang Pintu Dalam Tradisi Betawi. Hadirin nyang terhormat, rupenye di depan pintu ade kejadian rame. Rombongan Tuan Raje Mude kagak boleh masup. Dia dipegat ame jagoan kampung sini, diomelin, disuru balik lagi. Tapi rombongan Tuan Raje Mude kagak mao ngalah, dia juga bawa orang nyang jago omong dan pinter mantun, juga bawa jagoan. Pokoknye rame dah ni urusan. Orang Betawi nyebut peristiwa ini dengan name Buka Palang Pintu. Pertame-tame tuan rume atau pihak Tuan Putri ame rombongan tamu atau pihak Tuan Raje Mude maen pantun-pantunan, nyang pada intinye pihak rombongan Tuan Raje Mude kudu mampu ngebuka palang pintu alias jago nyang ude disiapin oleh Tuan Putri. (Ini artinye kalo perjaka Betawi mao berume tangge, die kudu siap secara lahiriyah untuk melindungi istri dan keluargenye dari semue halangan fisik). Tengtu aje dalem beklai atawe berantem, jago pihak Tuan Putri keok. Abis berantem, rombongan Tuan Raje Mude masing belon bole masup, soalnye syarat buat masup  belon cukup. Sambil mantun pihak Tuan Putri minta dibales tarikan atau kumandang sike (sike ini isinye shalawat kepada nabi Muhammad SAW dan ini tande bahwa si calon suami emang tidak diragukan lagi pengetahuan igamenye alias ahli ibadah) nyang ude dibacain. Kalu balesan tarikan sike dari pihak Tuan Raje Mude masing kalah merdu, rombongan Tuan Raje Mude belon boleh masup. Acare batal dan kudu balik lagi tige ari kemudian. Di beberapa tempat sike disebut juga yalil.

Seudenye bebales sike, baru rombongan Tuan Raje Mude bole masup dan langsung menuju puade.   (Di bawah ini contoh sederhana Dialog Buka Palang Pintu : diiringi musik instrumentalia Gambang Kromong).